د سولې په چارو کې د دولت وزير د قطر دولت له پلاوي سره وکتل
د سولې په چارو کې د دولت وزير سيد سعادت منصور نادري د افغانستان لپاره د قطر بهرنیو چارو وزارت او د شخړې د هوارۍ په برخه کې ځانګړي استازي, مطلق بن ماجد القحطاني په مشرۍ پلاوي سره وکتل.
په دغه کتنه کې د افغانستان د سولې پروسې ، د افغانستان د سولې مذاکراتو څرنګوالي او په دغه مذاکراتو کې د قطر د رول په اړه بحث او خبرې وشوې.
د سولې په چارو کې د دولت وزیر د افغانستان د سولې مذاکراتو کوربه توب له امله د قطر له دولت څخه د مننې ترڅنګ; د مذاکراتو په پیاوړي کولو کې د دغه هیواد پر رول ټینګار وکړ.
ښاغلي نادري د نظامي تحرکاتو او جګړې زياتوالي ته په اشاري سره زیاته کړه, چې د افغانستان اسلامي جمهوریت د کړکیچ په سیاسي حل باور لري او د سولې هوکړې ته رسیدو یواځنۍ ممکنه لاره مانا لرونکي مذاکراتو بولي.
ښاغلي قحطاني په دغه کتنه کې د مذاکرانو په پیاوړتیا باندې ټینګار وکړ او زیاته یې کړه چې هیواد به یې د سولې موافقو ته رسیدو په برخه کې خپلو همکاریو ته دوام ورکړي. هغه هیله څرګنده کړه, چې افغانستان به دوامداره او سرتاسري سوله ترلاسه کړي.
