د سولې په چارو کې د دولت وزارت د بشري حقونو او مدني ټولنې د چارو مرستیالې د افغان ښځو شبکې له یو شمېر عدالتغوښتونکو ځوانانو او ښځو سره وکتل
د سولې په چارو کې د دولت وزارت د بشري حقونو او مدني ټولنې د چارو مرستیالې ډاکتر عالمې د افغان ښځو شبکې له یو شمېر هغو ځوانانو او ښځو سره وکتل چې د سولې لپاره عدالتغوښتنه کوي.
په دې لیدنه کې د سولې لپاره عدالتغوښتونکو ځوانانو او ښځو د افغانستان د سولې مذاکراتو د پيلېدو هرکلی وکړ او دا یې باعزته او ټولشموله سولې ته د رسېدو ګام وباله. همدارنګه دوی د سولې په بهیر کې د ځوانانو د پراخې ونډې غوښتنه وکړه.
د دایمي اوربند اعلان، د اساسي قانون او جمهوریت ساتنه، د سولې په بهیر کې د ځوانانو بامعنا حضور، له شخړو او تاوتریخوالي څخه د اغېزمنو ځوانانو لپاره رواندرملیز خدمتونه وړاندې کول او په ټولنیزو، سیاسي، پوځي، اقتصادي او فرهنګي برخو کې پر ځوان نسل پانګونه نور هغه موارد دي چې د سولې لپاره د عدالتغوښتونکو ځوانانو ډلې وړاندې کړل.
همدارنګه دوی د سولې په چارو کې د دولت له وزارت څخه د سولې په برخه کې د فعالو ځوانانو او ښځو د ملاتړ غوښتنه وکړه.
د سولې په چارو کې د دولت وزارت د بشري حقونو او مدني ټولنې د چارو مرستیالې ډاکتر عالمې د افغان ښځو شبکې (AWN) له عدالتغوښتونکو ځوانانو او ښځو مننه وکړه او ویې ویل، د سولې په چارو کې د دولت وزارت تل کار او هڅه کړې چې د ټولنې ټول پاړکي په تېره بیا ښځې او ځوانان د سولې په بهیر کې فعاله ونډه ولري، تر څو ځوانان او ښځې ځانونه د سولې په بهیر کې ښکېل وګڼي.
ډاکتر عالمې همداراز وویل چې د افغانستان د اسلامي جمهوریت مذاکرهکوونکی پلاوی د جمهوري اسلامي نظام په استازیتوب په قطر کې دی او د ټولنې د ټولو پاړکو خبرې او غوښتنې به د مذاکرې مېز ته ورسوي.
د سولې په چارو کې د دولت وزارت د بشري حقونو او مدني ټولنې مرستیالې همداراز وویل چې خپل پروګرامونه به له ځوانانو او ښځو سره په همغږۍ تنظیم کړي.
