د افغانستان د ځوانانو له ډلې او د افغانو ښځو له شبکې سره د مذاکره کوونکي ټیم د غړو مشورتي ناسته
د ټولنې د بېلابېلو پاړکو د مشورې اخیستلو لپاره د مشورتي ناستو په لړ کې د افغانستان د اسلامي جمهوریت د مذاکره کوونکي ټیم غړو له اتو زونونو څخه د افغانستان د ځوانانو ډلې او د افغانو ښځو شبکې له ۲۱ غړو سره په آنلاین ډول بحث او خبرې اترې وکړې.
په سر کې د مذاکره کوونکي ټیم غړو ډاکترې حبیبې سرابي، خالد نور او شریفې زرمتۍ د سولې بهیر د پرمختګونو په اړه ګډونوالو ته معلومات ورکړل.
ورپسې ځوانانو د سولې د بهیر او د خبرو د پیل په اړه د مذاکره کوونکي ټیم له غړو سره خپل نظرونه شریک کړل.
ځوانانو له مذاکره کوونکي ټیم څخه وغوښتل چې د مهمو ملي ارزښتونو لکه جمهوریت، اساسي قانون په ځانګړي ډول د ښځو د حقونو او د بیان د آزادۍ دفاع وکړي.
دوی د سولې په خبرو کې د ښځو او ځوانانو پر بامعنا حضور ټینګار وکړ او د مذاکره کوونکي ټیم له غړو یې وغوښتل چې د دایمي اوربند پر اعلان تمرکز وکړي.
همدارنګه د غونډې ګډونوالو ټینګار وکړ چې د خبرو په لړ کې باید له ښکېلو لوریو او همدارنګه ګاونډیو هېوادونو څخه د سولې هوکړهلیک د عملي کولو لپاره تضمین واخیستل شي.
همداراز دغو ځوانانو او د افغان ښځو شبکې غړو د مذاکره کوونکي ټیم ملاتړ اعلان کړ او ویې ویل چې د سولې خبرو د ملاتړ لپاره به د ځوانانو د بسیج کولو په برخه کې کار وکړي.
په دې ناسته کې پرېکړه وشوه چې باید د ځوانانو د مشورو په برخه کې له مذاکره کوونکي ټیم سره همغږي وشي.
د یادولو ده چې مذاکره کوونکي ټیم تر دې مهاله له بېلابېلو پاړکو او د مدني ټولنې له بنسټونو سره څو ناستې کړې دي.
