د سولې په چارو کې د دولت وزارت د ولسي چارو ستر سلاکار د افغانستان د نوي فکر بنسټ له مشرتابه غړو سره وکتل
د سولې په چارو کې د دولت وزارت د ولسي چارو ستر سلاکار ډاکتر میرویس څرګند د افغانستان د نوي فکر بنسټ له مشرتابه غړو سره وکتل.
په دې لیدنه کې د افغانستان د نوي فکر بنسټ مشرتابه غړو په لغمان، ننګرهار او کنړ ولایتونو کې د ولسي غونډو په اړه معلومات وړاندې کړل.
د دغه بنسټ د مشرتابه غړو په خبره، د دغه بنسټ په جوړو کړو غونډو کې تر دوو زرو ډېرو کسانو ګډون کړی و او د سولې د بهیر ملاتړ یې اعلان کړ.
د سولې په چارو کې د دولت وزارت د ولسي چارو ستر سلاکار ډاکتر میرویس څرګند د دغه بنسټ له مشرتابه غړو مننه وکړه؛ د سولې بهیر په ښه کېدو کې یې د مدني ټولنې د بسنټونو رول مهم وباله او ویې ویل چې د مدني ټولنې بنسټونه د ټولنیزې سولې په رامنځته کولو کې اغېزناک فعالیت کولی شي.
همدارنګه ښاغلي څرګند وویل چې د سولې او ملي پخلاینې له ټینګښت پرته هېڅ پرمختګ هم پایله نهشي لرلای او د هېواد ټول پروګرامونه د سراسري سولې په ټینګښت پورې تړلي دي.
