د سولې په چارو کې د دولت وزارت غواړي چې د تلپاتې او عدالتمحورې سولې لپاره واحد غږ رامنځته شي
د سولې په چارو کې د دولت وزارت د مدني ټولنې د بنسټونو د انسجام رئیسې لیلا جعفري «د سولې په بهیر کې د خلکو غږ» په نامه ناسته کې د وینا پر مهال وویل چې دغه وزارت به د سولې بهیر په یوازې ځان پر مخ یونهسي او غواړي چې د سولې لپاره د خلکو څوګوني غږونه سره راټول کړي، تر څو د تلپاتې او عدالتمحورې سولې د ټینګښت لپاره واحد غږ رامنځته شي.
آغلې جعفري ټينګار وکړ چې دغه وزارت به د سولې د هوکړهلیک په لاسلیکېدو، تطبیق او څارنه کې د ټولنې د ټولو پاړکو نظرونه په پام کې ونیسي.
آغلې جعفري زیاته کړه چې په دغه وزارت کې د سولې بهیر د پرمخوړلو لپاره اړینې وړتیاوې شته. دې وویل دغه وزارت ژمن دی چې متخصص، مسلکي او د سولې په برخه کې پوه کسان جذب کړي تر څو د سولې په چارو کې د دولت وزارت تر چتر لاندې د پالیسیو په جوړولو او پلي کولو کې همکاري وکړي.
د بشري حقونو په چارو کې د دولت وزیرې سیما سمر هم په دې ناسته کې وینا وکړه. دې وویل، په دې کې شک نهشته چې ټول خلک سوله غواړي؛ خو داسې سوله چې د خلکو تر منځ برابري تضمین کړي او کوم تبعیض پکې نه وي.
بل پلو «د افغانستان د پالیسۍ د ډلې» همغږي کوونکي او د افغانستان د ژورنالېستانو د ملي اتحادیې رئیس محمد فهیم دشتي په دې ناسته کې «د سولې په بهیر کې د خلکو غږ» په نامه د شوې څېړنې موندنې وړاندې کړې.
ښاغلي دشتي وویل ټول هغه کسان چې مرکې ورسره شوې، د اوربند په اړه په یوه نظر دي؛ خو یوازې د اوربند د مودې په اړه نظرونه بېلابېل دي. ده وویل چې شپېته سلنه دغه کسان د سولې بهیر ته ښې هیلې لري، دېرش سلنه دغه بهیر ته اندېښمن دي او لس سلنه هم د دغه بهیر مخالف دي.
د سولې په بهیر کې د خلکو غږ رپوټ «فریدریش ایبرټ» ادارې او د افغانستان د پالیسۍ ډلې د بېلابېلو پاړکو له شپږ سوو کسانو سره د مرکو په پایله کې چمتو کړی.
