د فارسيژبو ترکتبارانو د انسجام شورا د سولې په برخه کې همکاري کوي
د سولې په چارو کې د دولت وزارت د ولسي چارو ستر سلاکار ډاکتر میرویس څرګند د افغانستان د فارسيژبو ترکتبارانو د شورا له رئیس او غړو سره وکتل.
د افغانستان د فارسيژبو ترکتبارانو د انسجام د شورا رئیس عظیم خنجاني وویل چې زموږ شورا د سولې د بهیر ملاتړ کوي او زیاته یې کړه، دغه شورا چمتو ده چې د سولې په چارو کې د دولت له وزارت سره په همغږۍ د سولې د بهیر اسانولو لپاره کار وکړي.
همدارنګه ده وویل چې دې شورا د سولې لپاره یوه طرحه جوړه کړې ده چې ډېره ژر به له وزارت سره شریکه شي.
د دې شورا د مشرتابه پلاوي یوه غړي عبدالعالم هاشمبېګ د سولې په چارو کې د دولت له وزارت سره د دې شورا پر همکارۍ ټينګار وکړ او ویې ویل، اړتیا ده چې د سولې بهیر ولسي وي او د شهیدانو او معلولینو کورنۍ هم پکې برخهوالې وي.
د سولې په چارو کې د دولت وزارت د ولسي چارو ستر سلاکار ډاکتر میرویس څرګند وویل چې دغه وزارت د سولې لپاره د هر ډول همکارۍ ملاتړ کوي.
همدارنګه ده وویل چې د سولې په چارو کې د دولت وزارت یوازنۍ اداره ده چې د سولې بهیر د پرمخ بېولو مسوولیت لري او اړینه ده چې ټولې ادارې له دغه وزارت سره په همکارۍ په منسجم ډول کار وکړي.
